गैँडाको आक्रमणबाट एक जना गम्भीर घाइते

नवलपरासी, १९ पुस, 
नवलपरासी(बर्दघाट सुस्तापूर्व)को कावासोतीमा गैँडाको आक्रमणबाट एक जना गम्भीर घाइते भएका छन् ।
जिल्ला प्रहरी कार्यालय नवलपरासी(बर्दघाट सुस्तापूर्व)का प्रहरी नायब उपरीक्षक वेदबहादुर पौडेलका अनुसार गैँडाको आक्रमणमा परी कावासोती नगरपालिका ७ निवासी पतिराम महतो गम्भीर घाइते हुनु भएको हो । उहाँको दाहिने खुट्टामा चोट लागेको छ । आज बिहान १० बजेतिर कावासोती नगरपालिका ८ को मनकामना सामुदायिक वनमा दाउरा खोज्ने क्रममा महतोलाई गैँडाले आक्रमण गरी घाइते बनाएको हो ।
उहाँको कालीगण्डकी नारायणी सामुदायिक अस्पताल कावासोतीमा उपचार भईरहेको छ । नवलपरासी(बर्दघाट सुस्तापूर्व)मा पछिल्लो समय जङ्गली जनवारको आतङ्क बढेको छ ।
केही दिन अघि हुप्सेकोट गाउँपालिका–४ मा बाघको आक्रमणमा परी चार वटा बाख्रा मरेको थियो भने एक साता अघि विनयी त्रिवेणी गाउँपालिका १ मा बाघकै आक्रमणमा परी सासूबुहारीको निधन भएको थियो ।