विनयी त्रिवेणी गाउँपालिका स्तरीय राष्ट्रपति रनिङ शिल्डको उपाधि मणिसंगम मावि लाई

विनयी त्रिवेणी ,२३ कात्तिक
नवलपरासी(बर्दघाट सुस्तापूर्व)को विनयी त्रिवेणी गाउँपालिकास्तरीय राष्ट्रपति रनिङ सिल्ड खेलकुद प्रतियोगितामा मणिसंगम मावि विनयी त्रिवेणी २ प्रथम भएको छ । प्रतियोगितामा कुला १५ स्वर्ण, पाँच रजत र चार कास्य पदक सहित मणिसंगम मावि छैटौँ पटक गाउँ पालिका स्तरीय राष्ट्रपति रनिङ सिल्ड प्रतियोगितामा प्रथम भएको हो । त्यसैगरी भानुदय मावि विनयी त्रिवेणी ५ ले छ स्वर्ण , छ रजत र तीन कास्य पदक सहित द्वितीय भएको छ । भानुदय नमुना मावि विनयी त्रिवेणी १ ले तीन स्वर्ण ,तीन रजत र तीन कास्य पदक सहित तृतीय भएको छ । शिवपुर गढि मा वि विनयी त्रिवेणी ६ ले दुई स्वर्ण, तीन रजत र एक कास्य पदक प्राप्त गरेको छ ।
प्रतियोगिताको समापन गर्दै विनयी त्रिवेणी गाउँपालिका अध्यक्ष घनश्याम गिरीले गाउँपालिका भित्र खेलकुदको प्रवर्धनका लागि पहल गरिएको बताउनु भयो । विद्यालय तह देखि नै खेलकुदको विकास गर्दै खेलकुदमा नमुना गाउँपालिका बनाउने योजना गरेको उहाँले बताउनु भयो ।
प्रत्येक वडाहरूमा खेल मैदान, खेल सामाग्री र खेलकुद प्रतियोगिताका लागि विभिन्न कार्यक्रमहरू सञ्चालन गरिएको अध्यक्ष गिरीले बताउनु भयो ।
स्थानीयस्तरमा रहेका खेलाडीको क्षमता अभिवृद्धिका लागि गाउँपालिकास्तरीय राष्ट्रपति रनिङशिल्ड प्रतियोगिता सञ्चालन गरिएको अध्यक्ष गिरीले बताउनु भयो । उहाँले भन्नु भयो, ’हामीले गाउँपालिकामा रहेका खेलाडीको प्रतिभा पहिचान र क्षमता अभिवृद्धिका लागि प्रतियोगिता सञ्चालन गरेका हौं।’
एथलेटिक्स तर्फ एकसय मिटर,२ सय मिटर दौड, हाइजम्प, लङजम्प, सटफुट, त्रिपलजम्व लगायतका खेल समावेश गरिएका थिए । प्रतियोगिताका विजेताहरूलाई शिल्ड, प्रमाणपत्र र मेडल प्रदान गरिएको छ।
१६ औँ राष्ट्रपति रनिङ शिल्ड खेलकुद स्थानीय तह छनौट प्रतियोगिता २०८० भानुदय मावि विनयी त्रिवेणी ५ चुकाहामा यही २१ गते देखि सुरु भएको थियो । प्रतियोगितामा गाउँपालिका भित्रका १२ वटा विद्यालयले सहभागिता जनाएका थिए । कार्यक्रममा जनप्रतिनिधीहरू, विद्यालयका शिक्षक, विद्यार्थी लगाएतको सहभागिता रहेको संगम गिरीले जानकारी दिनु भयो ।