गैँडाकोटमा मोटरसाइकल दुर्घटना हुँदा एकको मृत्यु एक गम्भीर घाइते

मध्यविन्दु(नवलपरासी), २० मङ्सिर,
काली गण्डकी कोरिडोर अन्तर्गत नवलपरासी(बर्दघाट सुस्तापूर्व)को गैँडाकोटमा मोटरसाइकल दुर्घटना हुँदा एक जनाको मृत्यु भएको छ । सोही दुर्घटनामा अर्का एक जना गम्भीर घाइते भएका छन् ।
गए राति गैँडाकोट नगरपालिका–४ ईट्टाभट्टी स्थित काली गण्डकी कोरिडोरमा बा.प्र.०६–००१ प ६२७३ नं.को मोटरसाइकल दुर्घटना हुँदा दुई जना गम्भीर घाइते भएकोमा एक जनाको आज बिहान मृत्यु भएको हो ।
मृत्यु हुनेमा रुपन्देहीको सिद्धार्थनगर नगरपालिका–७ बस्ने ३५ वर्षीय पंकज ज्ञवाली रहेको इलाका प्रहरी कार्यालय गैँडाकोटका प्रहरी निरीक्षक कमला नरालले बताउनु भयो । मोटरसाइकलमा सवार दुई जना गम्भीर घाइते भई उपचारको लागि भरतपुर लगिएकोमा एक जनाको मृत्यु भएको हो ।
मोटरसाइकल चालक लमजुङको सुन्दर बजार नगरपालिका फेदीकुना बस्ने ३९ वर्षीय सुक बहादुर गुरुङको नयाँ मेडिकल कलेज चितवन उपचार भई रहेको छ ।