काभलाको समर्थन गर्ने १० मुलुकका राजदूतलाई टर्कीले गर्यो देश निकाला
निष्कर्ष |
काठमाडौं – टर्कीले घरेलु मामिलामा हस्तक्षेप गरेको आरोप लगाउँदै अमेरिका, फ्रान्सलगायत १० देशका राजदूतलाई देश निकाला गर्न आदेश दिएको छ । टर्कीका राष्ट्रपति रिसेप तैयप एर्डोगानले शनिबार आफ्नो विदेश मन्त्रालयलाई उक्त आदेश दिएका हुन् ।
अमेरिकासहित ती देशले सामाजिक कार्यकर्ता उस्मान काभलाको रिहाइको समर्थन गरेको बताइएको छ । यसपछि टर्कीको राष्ट्रपतिले उक्त कारबाही गरेका हुन् ।
राष्ट्रपति एर्डाैगानले उत्तर पश्चिमी टर्कीको एस्किसेहिर सहरमा भाषणका क्रममा उक्त जानकारी दिएका हुन् । चर्काे स्वरमा उनले भने, ‘यस कारबाहीबाट ती देशले टर्की कस्तो मुलुक हो भन्ने बुझ्छन् ।’
चार वर्षदेखि जेलमा छन् काभला
उस्मान काभला ४ वर्षदेखि जेलमा छन् । उनीविरुद्ध सन् २०१३ मा देशव्यापी विरोधका लागि आर्थिक सहयोग गरेको आरोप छ । टर्की सरकारले उनीविरुद्ध सन् २०१६ मा गरिएको असफल विद्रोहमा पनि उस्मानकै हात रहेको आरोप पनि लगाएको छ । तर उनले उक्त आरोप अस्वीकार गरिरहेका छन् । काभलालाई सन् १०१७ मा गिरफ्तार गरिएको थियो ।
यी १० देशका राजदूतलाई कारबाही
यही अक्टोबर १८ मा अमेरिका, फ्रान्स, जर्मनी, क्यानाडा, डेनमार्क, नेदरल्यान्ड, नर्वे, स्विडेन, फिनल्यान्ड र न्युजिल्यान्डका राजदूतले संयुक्त विज्ञप्ति जारी गरी कवलाको रिहाइको माग गरेका थिए । उनीहरूले सामाजिक कार्यकर्ता काभलाका विषयमा चाँडो निर्णय गर्न टर्की सरकारलाई दबाब दिएका थिए ।
यसपछि टर्कीको विदेश मन्त्रालयले यी सबै देशका राजदूतलाई बोलाएर गैरजिम्मेवार अभिव्यक्ति दिएको भनेर आलोचना गर्यो । यसको चार दिनपछि शनिबार उनीहरूलाई टर्की छाड्न निर्देशन दिइएको हो । एजेन्सी
