पोखरामा १३ वर्षीय बालकको डेङ्गुबाट मृत्यु, प्रदेशमा १० हजार सङ्क्रमित
निष्कर्ष |
लेखनाथ, असोज १० गते। पोखरा महानगरमा डेङ्गु सङ्क्रमितको सङ्ख्या बढ्दै गएको छ। सङ्क्रमित बढेसँगै महानगरमा यसबाट पाँच जनाको मृत्यु भइसकेको छ। पश्चिमाञ्चल क्षेत्रीय अस्पतालमा उपचारका क्रममा बिहीबार १३ वर्षीय बालकको मृत्यु भएको हो।
तनहुँ र म्याग्दीका एक/एक जनाको यसबाट मृत्यु भइसकेको छ। गण्डकी प्रदेशमा डेङ्गुबाट मृत्यु हुनेको सङ्ख्या सात पुगेको छ। स्वास्थ्य निर्देशनालय गण्डकीका महानिर्देशक खिमबहादुर खड्काले उपचारका क्रममा डेङ्गु सङ्क्रमित स्याङ्जा घर भई पोखरा–१५, नयाँगाउँ बस्ने सुशान्त सारुको मृत्यु भएको जानकारी दिनुभयो।
सरुका बुवा परिवारको सम्पर्कमा हुनुहुन्न भने आमा वैदेशिक रोजगारीमा हुनुहुन्छ। पोखरा महानगरमा यसअघि यस एक पुरुष र तीन महिलाको डेङ्गी सङ्क्रमणबाट ज्यान गइसकेको छ। यसअघि वृद्धवस्थाका बिरामीको ज्यान गएकोमा प्रदेशमै पहिलो पटक बालकको डेङ्गुका कारण ज्यान गएको हो।
प्रदेशमा सबैभन्दा बढी कास्कीमा चार हजार नौ सय २३ जना सङ्क्रमित रहेकोमा पोखरा महानगरका मात्रै चार हजार आठ सय १५ जना छन्। पोखरापछि सबैभन्दा बढी सङ्क्रमित तनहुँको आबुँखैरेनी गाउँपालिकामा एक हजार तीन सय आठ जना छन्।
गण्डकी प्रदेशमा नौ हजार सात सय १२ जना सङ्क्रमित पुगेका छन्। मुस्ताङ तीन जना सङ्क्रमित हुँदा अहिलेसम्म मनाङमा भने डेङ्गु देखिएको छैन।
कास्कीपछि तनहुँमा तनहुँमा दुई हजार चार सय ४६ जना डेङ्गु सङ्क्रमित छन्। लमजुङमा ९४, नवलपुरमा एक सय २३ जना, म्याग्दी एक सय ४५ जना, बागलुङमा तीन सय २४ जना, स्याङ्जा तीन सय ४४ जना, गोरखामा चार सय ५० जना र पर्वतमा आठ सय ५८ जना संक्रमित भएका छन्।
स्वास्थ्य निर्देशनालय गण्डकीका महानिर्देशक खड्काले टोल टोलसम्म डेङ्गुबारे सचेतना र सरसफाइ अभियान नपुगेसम्म डेङ्गु सङ्क्रमण नघट्ने उल्लेख गर्नुभयो। उहाँ भन्नुहुन्छ, “हाम्रा तालिम, माथिका अभियानले पुग्दैन। टोल टोलसम्म सरसफाइ र सचेतना अझै पुगेको देखिएन। अब त्यता ध्यान दिन जरुरी छ। ”
