नवलपुरमा पाँच बटा गिद्ध मृत फेला

मध्यविन्दु (नवलपरासी), ७ फागुन,
नवलपरासी(बर्दघाट सुस्तापूर्व)को कावासोती नगरपालिका–११ लोकाहा खोला किनारमा पाँच वटा गिद्ध(जटायु) मृत फेला परेका छन् । चार वटा डङ्गर प्रजाति र एक वटा हिमाली प्रजातिको गिद्ध मृत फेला परेको जटायु रेस्टुरेन्टका अध्यक्ष डिबि चौधरीले बताउनु भयो ।
सोही स्थानमा एक वटा सुन गिद्ध र छ वटा डंङ्गर प्रजातिको गिद्ध बिरामी अवस्थामा फेला परेको चौधरीले बताउनु भयो । बिरामी मध्ये एक वटा डङ्गर गिद्धको अवस्था गम्भीर रहेको छ ।
गिद्ध मरेको स्थानमा दुई वटा मरेको स्यालको सिनो समेत फेला परेकाले तेहि सिनो खाएर गिद्ध मरेको आशङ्का गरिएको छ । अध्यक्ष चौधरीले भन्नुभयो“विषादीयुक्त खाना खाएर मरेको स्यालको सिनो खाएर गिद्ध मरेको प्रारम्भिक अनुसन्धानबाट देखिएको छ।”
खोला किनारमा गिद्ध मृत देखे पछि स्थानीयले जटायु रेस्टुरेन्टमा खबर गरेका थिए । मरेका गिद्धको मङ्गलवार पोस्टमार्टम गरिने तथा बिरामी गिद्धलाई घटनास्थलमा प्राथमिक उपचार पछि जटायु रेस्टुरेन्ट लगेर उपचार गरिने अध्यक्ष चौधरीले जानकारी दिनु भयो ।