मलामी गएका पुरुष नारायणीमा बेपत्ता

कावासोती, १६ कात्तिक,
नवलपरासी(बर्दघाट सुस्तापूर्व)मा छिमेकी गाउँलेको मलाम गएका एक जना पुरुष नारायणी नदीमा बेपत्ता भएका छन् ।
कावासोती नगरपालिका–७ साँढ निवासी ४० वर्षीय खेमनारायण महतो नदीमा बेपत्ता हुनु भएको जिल्ला प्रहरी कार्यालय नवलपरासी(बर्दघाट सुस्तापूर्व)का प्रहरी नायब उपरीक्षक बेद बहादुर पौडेलले बताउनु भयो ।
“कावासोती नगरपालिका १३ घोसरघाटमा मलामी जानु भएका महतो साथीहरूसँगै नारायणीमा पौडिएर नारायणी पार गर्ने क्रममा बेपत्ता हुनु भएको हो,” प्रहरी नायब उपरीक्षक पौडेलले भन्नु भयो,“आज दिनभर खोजी कार्य गरे पनि फेला पार्न सकिएन् ।”
उनलाई सशस्त्र प्रहरी, स्थानीय बासिन्दा, नेपाली सेना, नेपाल प्रहरी, निकुञ्जको हात्ती र डुङ्गा समेत लगाएर खोजे पनि फेला पर्न नसकेको हो । बेपत्ता महतोको भोलि बिहानैबाट पुन खोजी गरिने र भोलि गोताखोर समेत परिचालन गरिने प्रहरी नायब उपरीक्षक पौडेलले जानकारी दिनु भयो ।