फेसबुकमा पछ्याउनुहोस्
मध्यविन्दु (नवलपरासी), १९ चैत
नारायणगढ–बुटवल सडकको पूर्वी खण्ड नवलपरासी(बर्दघाट सुस्तापूर्व) क्षेत्रमा एकतर्फको ५० किलोमिटर सडक कालोपत्रे भएको छ । गैँडाकोट देखि दाउन्ने सम्मको ६३ किलोमिटरमध्ये एकतर्फको ५० किलोमिटर सडक कालोपत्रे पुरा भएको आयोजना पूर्वी खण्डका सूचना अधिकारी इन्जिनियर शिव खनालले बताउनु भयो ।
“पूर्वी खण्डमा एकतर्फ गैँडाकोट देखि दुम्कीवास सम्म कालोपत्रे भएको छ”,उहाँले भन्नु भयो,“अर्को तर्फको कालोपत्रे कार्य पनि समानान्तर रूपमा भइरहेको छ ।”
दाउन्ने खण्डको चार किलोमिटर सहित बाँकी १३ किलोमिटर पनि वर्षा अगावै निर्माण सम्पन्न गर्ने लक्ष्य सहित अहिले निर्माणको काम भई रहेको सूचना अधिकारी खनालले जनकारी दिनु भयो ।
“यस खण्डमा सबैभन्दा बढी यात्रुले सास्ती भोग्नुपर्ने दाउन्ने खण्डको चार किलोमिटर र घुमाउरो घुम्तीमा चार किलोमिटर सडक वर्षा अगाडि नै ढलान गरिने आयोजनाले लक्ष लिएको छ”,उहाँले भन्नु भयो,“कल्भर्ट तथा बाँकी पुलको निर्माण, १३ स्थानमा बेस तथा सब–बेसका कामहरू भइरहेको छ ।”
वर्षा अगाडि नै पूर्वी खण्डको ६३ किलोमिटरमा एकतर्फी कालोपत्रे सम्पन्न गर्ने गरी कामलाई तीव्रता दिइएको सडक विस्तारको ठेक्का पाएको निर्माण कम्पनी चाइना स्टेट कन्स्ट्रक्सन इन्जिनियरिङका सह व्यवस्थापक राकेश झाले बताउनु भयो ।
“दाउन्ने खण्डको हालको समस्या समाधान गर्न आवश्यक मर्मत सम्भार सहित अप्ठेरो घुम्तीमा ढलान सडक निर्माण कार्य यसै साताबाट सुरु हुने छ”,उहाँले भन्नु भयो ।
दाउन्ने खण्डमा अहिले सडक विस्तारको काम अन्तरगत कल्भर्ट निर्माण र कटिङको काम भइरहेको छ । दाउन्ने क्षेत्रमा अधिकांश बाटो एक तर्फी मात्र सञ्चालनमा रहेका छन् । दाउन्नेमा पहाड खन्ने र भएको पिच भत्काइनाले यात्रुहरू दिनहुँ कष्ट भोग्न बाध्य छन् ।
२०७५ चैतमा काम सुरु गरेर २०७९ साउनमा निर्माण सम्पन्न गर्ने गरी बिस्तार सुरु गरिएको नारायणगढ–बुटवल सडक अहिले सम्म ५८ प्रतिशत कार्य सकिएको छ । काम नसकिए पछि पहिलो पटक २०८० साउन ११ गते सम्मका लागि म्याद थप भएको थियो । पहिलो पटक थप भएको म्यादमा पनि कामले गति नलिएपछि दोस्रो पटक २०८१ साउन ८ गते सम्म म्याद थप गरिएको थियो । तर दोस्रो पटक पनि काम सम्पन्न नभएपछि सरकारले अन्तिम पटक भन्दै २०८२ साउन ८ गतेसम्मका लागि म्याद थप गरेको छ ।
नारायणगढ–बुटवल सडक खण्डको ११४ किलोमिटर अन्तर्गत गैँडाकोट देखि दाउन्नेसम्मको ६५ किलोमिटर मध्ये बजार क्षेत्रमा सर्भिस लेनसहित ६ र जोखिम बढी रहेको क्षेत्र मानिने दाउन्नेको १४ किलोमिटर खण्डमा ३ लेनको सडक विस्तारको काम चलिरहेको छ ।
