तरकारी बजारमा आउने तरकारी तथा फलफूलको विषादी परीक्षण गर्ने क्रममा रायोको सागमा शनिबार ९९ प्रतिशतसम्म विषादी भेटिएको विषादी अवशेष द्रुत विश्लेषण प्रयोगशाला इकाइ, कावासोतीका नायब प्राविधिक सहायक वीरेन्द्र भण्डारीले जानकारी दिए। अत्यधिक विषादी भेटिएको साग जफत गरेर नष्ट गरिएको छ।
फलफूल तथा तरकारीमा कार्बामेट र अर्गानोफस्फेट ३५ प्रतिशतभन्दा कम मात्र भएमा खान योग्य मानिने भए पनि, सोभन्दा बढी भेटिएकाले जफत गरिएको कावासोती नगरपालिका पशु विकास शाखा प्रमुख डा टेकराज पौडेलले बताए।
अफ सिजनको तरकारी भएकाले बढी विषादी प्रयोग गरिएको र विषादी प्रयोग गरे लगत्तै बजारमा पठाइएकाले विषादीको मात्रा अत्यधिक भेटिएको प्राविधिकहरूको भनाइ छ।
पूर्वी नवलपरासीको सदरमुकाम कावासोतीमा तरकारी तथा फलफूलको विषादी परीक्षण केन्द्र सञ्चालनमा आएपछि नियमित रूपमा परीक्षण हुँदै आएको छ। नेपाल सरकारको कृषि तथा पशुपन्छी विकास मन्त्रालयअन्तर्गत कृषि प्रयोगशालाले विषादी अवशेष द्रुत विश्लेषण प्रयोगशाला एकाइ सञ्चालनमा ल्याएको हो।थोक बजारबाट नियमित रूपमा नमुना सङ्कलन गरेर कार्बामेट र अर्गानोफस्फेट समूहमा पर्ने विभिन्न विषादीको परीक्षण गरिँदै आएको छ।
