नारायणगढ बुटवल सडक : दाउन्नेमा आवागमन बन्द गरेर काम गरिने

मध्यविन्दु (नवलपरासी), २३ चैत
नारायणगढ–बुटवल सडक खण्ड अन्तरगतको दाउन्नेक्षेत्रमा सडक विस्तारका लागि सवारी आवागमन बन्द गरेर काम गरिने भएको छ ।
शनिवार बसेको सरोकारवालाहरूको बैठकले दाउन्ने क्षेत्रमा चैत २७ गते देखि चैत ३१ गतेसम्म दिनको ११ बजेदेखि ३ बजे सम्म र २०८२ वैशाख १ गते देखि वैशाख १५ गतेसम्म रातिको ११ बजेदेखि बिहान ५ बजेसम्म अत्यावश्यक बाहेकका सवारी सञ्चालनमा रोक लगाएर सडक विस्तारको काम गर्ने निर्णय गरिएको विनयी त्रिवेणी गाउँपालिकाका अध्यक्ष घनश्याम गिरीले बताउनु भयो ।

नवलपरासी बर्दघाट सुस्ता पूर्व र पश्चिमका सरोकारवालाहरूको दाउन्नेमा बसेको बैठकले आवागमन बन्द गरेर सडक विस्तारको कामलाई तीव्रता दिने निर्णय गरिएको अध्यक्ष गिरीले जानकारी दिनु भयो ।
“दाउन्ने खण्डमा आवश्यक मर्मत सम्भार गरी यातायातलाई सहज ढङ्गले सुचारु गर्न र सो खण्डमा भित्तातर्फ कटिङ गर्न बाँकी रहेको कामलाई वर्षा अगावै सम्पन्न गर्नका निम्ति दैनिक केही घण्टा आवागमन बन्द गरेर काम गर्ने निर्णय गरिएको छ”,उहाँले भन्नु भयो ।नवलपरासी बर्दघाट सुस्ता पूर्व र पश्चिमका जिल्ला समन्वय प्रमुखहरू, प्रमुख जिल्ला अधिकारीहरू, बर्दघाट नगरपालिका प्रमुख, विनयी त्रिवेणी गाउँपालिका प्रमुख, दुवै योजनाका योजना प्रमुख, योजनाको परामर्शदाता, निर्माण व्यवसायी एवं सुरक्षा निकायका प्रमुखहरू समेतको संयुक्त बैठकले दाउन्ने सडक दैनिक केही घण्टा बन्द गरेर भए पनि निर्माण कार्यमा तीव्रता दिने निर्णय गरेको हो ।

नारायणगढ–बुटवल सडक खण्डको अन्य क्षेत्रमा धमाधम कालोपत्रे गरिए पनि दाउन्ने क्षेत्रमा भने उबड–खाबड सडक, साँघुरा घुम्ती, निर्माणका लागि बनाइएका अस्थायी डाइभर्सन र धुलाम्मे बाटोले यात्रालाई कष्टकर बनाएको छ । सडक विस्तारका क्रममा भत्काइएका संरचनाहरू समयमै पुनर्निर्माण नहुँदा यात्रुहरू दिनहुँ कष्ट भोग्न बाध्य छन् ।अहिले दाउन्ने खण्डमा पहाड काट्ने, पर्खाल लगाउने र कल्भर्ट निर्माणको काम भइरहेको पूर्वी खण्डका सूचना अधिकारी इन्जिनियर शिव खनालले बताउनु भयो ।
“अबको एक हप्ताभित्रमा दाउन्ने सडक खण्ड मर्मत सम्भार भई यातायात सञ्चालनमा सहज हुने छ”,उहाँले भन्नु भयो,“सवारी आवागमन बन्द गरेर निर्माण कार्य गर्न सहज हुने र काममा प्रगति हुने छ ।”

नारायणगढ–बुटवल सडक खण्डको ११४ किलोमिटर अन्तर्गत गैँडाकोट देखि दाउन्नेसम्मको ६५ किलोमिटर मध्ये बजार क्षेत्रमा सर्भिस लेनसहित ६ र जोखिम बढी रहेको क्षेत्र मानिने दाउन्नेको १४ किलोमिटर खण्डमा ३ लेनको सडक विस्तारको काम चलिरहेको छ ।
१७ अर्ब लागतमा सडक निर्माणको ठेक्का पाएको चाइना स्टेट इन्जिनियरिङ कर्पोरेसनले हालसम्म ३ पटक म्याद थपिसकेको छ । निर्धारित समयमा काम सम्पन्न नभएपछि तेस्रो पटक थप भएको म्याद २०८२ साउन ८ गते सम्म रहेको छ ।