फेसबुकमा पछ्याउनुहोस्
हुप्सेकोट, २४ फागुन
एक सय १५ औँ अन्तर्राष्ट्रिय नारी दिवसका अवसरमा नवलपरासी(बर्दघाट सुस्तापूर्व)को हुप्सेकोट गाउँपालिकाले आयोजना गरेको महिला म्याराथन प्रतियोगितामा हुप्सेकोट ६ कि रुपा हमाल प्रथम हुनुभएको छ ।
निर्धारित दुरी ६.६ किलोमिटर ३८ मिनेट ४३ सेकेन्डमा पूरा गर्दै हमाल प्रथम हुनुभएको हो । निर्धारित दुरी ३९ मिनेट ४ सेकेन्डमा पूरा गर्दै हुप्सेकोट १ कि अस्मिता घर्ती द्धितिय हुनुभयो । त्यस्तै ४० मिनेट ११ सेकेन्डमा निर्धारित दुरी पूरा गरी हुप्सेकोट ४ कि सूचना राई तृतीय हुनुभएको छ ।
प्रथम,द्धितिय र तृतीय हुने प्रतियोगीलाई क्रमशः १५ हजार, १० हजार र ५ हजार नगद पुरस्कार सहित ट्रफी प्रदान गरिएको छ । विजयी प्रतियोगीलाई सम्मान गर्दै गाउँपालिका अध्यक्ष लक्ष्मीदेवी पाण्डेले महिलाहरूलाई खेल क्षेत्रमा आकर्षित गर्नकोलागि प्रतियोगिताको आयोजना गरिएको बताउनुभयो । अन्तर्राष्ट्रिय नारी दिवसको अवसरमा पहिलो पटक गरिएको यस म्याराथन प्रतियोगितालाई प्रत्येक वर्ष आयोजना गर्ने अध्यक्ष पाण्डेले प्रतिबद्धता व्यक्त गर्नुभयो ।
गाउँपालिका भित्रका १८ वर्ष देखि ३० वर्ष उमेर समूहका २९ जना महिला धावक प्रतियोगितामा सहभागी भएका थिए ।
