फेसबुकमा पछ्याउनुहोस्
हुप्सेकोट, २३ फागुन
गाउँपालिका राष्ट्रिय महासंघका केन्द्रीय अध्यक्ष लक्ष्मीदेवी पाण्डेले प्राविधिक शिक्षाको महत्त्व गाउँ गाउँमा पुर्याउन आवश्यक रहेको बताउनु भएको छ ।
हुप्सेकोट प्राविधिक शिक्षालयको तेस्रो शिक्षालय सभा उद्घाटन गर्दै अध्यक्ष पाण्डेले प्राविधिक शिक्षाप्रति गाउँमा अझै आकर्षण बढ्न नसकेको बताउनु भयो । स्थानीय सरकार, प्रदेश सरकार र सङ्घ सरकारकै प्राथमिकता प्राविधिक शिक्षामा देखिए पनि अपेक्षाकृत रूपमा प्राविधिक शिक्षामा अभिभावक र विद्यार्थीको आकर्षण नदेखिएको उहाँले बताउनु भयो ।
सिटिइभिटी र हुप्सेकोट गाउँपालिकाको साझेदारीमा सञ्चालित हुप्सेकोट प्राविधिक शिक्षालयमा स्थानीय विद्यार्थीको सहभागिता बढाउँदै आगामी कार्यक्रम सञ्चालन गर्न पनि अध्यक्ष पाण्डेले सुझाव दिनु भयो ।
“हुप्सेकोट प्राविधिक शिक्षालयको आवश्यक भौतिक निर्माण लगायतका कार्यहरू सम्पन्न गरेर आङ्गिक बहु प्राविधिक शिक्षालय स्थापनाका लागि अभियान सञ्चालन गरिने र जसरी पनि पूरा गरी छाड्ने लक्ष्य रहेको छु”, अध्यक्ष पाण्डेले भन्नु भयो ।
प्राविधिक शिक्षा तथा व्यावसायिक तालिम परिषद् सिटिइभिटी गण्डकी प्रदेश प्रमुख कल्पकुमार बस्नेतले गण्डकी प्रदेशमा सञ्चालित प्राविधिक शिक्षालयहरूमध्ये हुप्सेकोट प्राविधिक शिक्षालय उत्कृष्ट रहेको बताउनु भयो । स्थापनाको छोटो समयमा नै शैक्षिक गतिविधिहरूलाई व्यवस्थित गर्दै लैजान शिक्षालय सफल भएकोमा उनले बधाई समेत व्यक्त गर्नु भयो । स्थानीय आवश्यकता र स्रोतलाई आधार मानेर थप प्राविधिक कक्षाहरू सञ्चालन गर्न पनि आचार्यले शिक्षालयलाई सुझाव दिनु भयो ।
शिक्षालय सभाको उद्घाटन कार्यक्रममा बोल्दै हुप्सेकोट गाउँपालिका उपाध्यक्ष पूर्ण सिंह रानाले प्राविधिक शिक्षाको महत्त्व दिनप्रतिदिन बढ्दो रहेको बताउनु भयो । गाउँ गाउँमा पशु र कृषि प्रविधिको आवश्यकता बढ्दो रहेकाले अध्ययन पछिको रोजगारी अन्य सङ्कायभन्दा राम्रो रहेकाले प्राविधिक शिक्षा प्रति विद्यार्थीको आकर्षण बढाउनु पर्ने उपाध्यक्ष रानाले जोड दिनु भयो ।
कार्यक्रममा बोल्दै नेपाली काँग्रेस हुप्सेकोट गाउँ समिति सभापति बलबहादुर रानाले हुप्सेकोट गाउँमा नै प्राविधिक शिक्षा दिन गाउँपालिकाले गरेको लगानी प्रति धन्यवाद व्यक्त गर्नु भयो । आफू पनि विगतमा प्राविधिक शिक्षा अध्ययनका लागि निकै कष्ट गरेर बाहिर गएर पढ्नु परेको स्मरण गर्दै अहिले गाउँ मानै सो सुविधा उपलब्ध भएको प्रति उहाँले खुसी व्यक्त गर्नु भयो ।
वि.स.२०७७ असोज २० गते अनुमति प्राप्त गरी सञ्चालनमा रहेको हुप्सेकोट प्राविधिक शिक्षालयको आफ्नै भवन निर्माण कार्य जारी रहेको शिक्षालय प्रमुख लालचन्द्र लामिछानेले बताउनु भयो । शिक्षालयमा हाल तीन वर्षे बाली विज्ञान र तीन वर्षे पशु विज्ञानका कक्षामा एक सय १८ जना विद्यार्थी अध्ययनरत रहेको शिक्षालय प्रमुख लामिछानेले जानकारी दिनु भयो ।
शिक्षालय सभाको उद्घाटन कार्यक्रममा हुप्सेकोट गाउँपालिकाका प्रमुख प्रशासकीय अधिकृत हरिप्रसाद पराजुली, हुप्सेकोट गाउँपालिका प्रवक्ता रेवती सारू, वडा न..१ का वडा अध्यक्ष प्रेम बहादुर घर्ती, वडा २ का वडा अध्यक्ष कृष्ण बहादुर थापा , वडा न. ३ का वडा अध्यक्ष विष्णु राना, वडा नं.५ का वडा अध्यक्ष पदम बहादुर राना, वडा नं.६ का वडा अध्यक्ष छम बहादुर सोमै, शिक्षा शाखा प्रमुख माधव राज गौतम सहित विभिन्न विद्यालयका प्रधानाध्यापक , विभिन्न सङ्घ संस्थाका प्रतिनिधि, राजनैतिक दलका प्रतिनिधिहरूको उपस्थिति रहेको थियो ।
