फेसबुकमा पछ्याउनुहोस्
नवलपुरको कावासोती नगरपालिकाको किशोरी अभियन्ता सवनम सुनार एसियन गल्र्स इन एक्सन परियोजना २०२४ अन्तर्गतको अन्तर्राष्ट्रिय प्रतिस्पर्धामा सहभागीको लागि छनौट हुनुभएको छ ।
एसिया महादेशको १५ देशहरुबाट १०० जनाको आवेदन परेको र १० जना छनौट भएकोमा नेपालबाट सवनम सुनार छनौट हुनुभएको हो । सवनम सुनार, कावासोती ६ निवासी र हाल कक्षा ११ मा अध्ययनरत हुनुहुन्छ । उहाँ कावासोतीमा भर्खरै सम्पन्न भएको किशोरी सशक्तीकरण कार्यक्रमको साथी शिक्षकको रूपमा ३ वर्षसम्म क्रियाशील हुँदै युनिसेफको ग्लोबल गल्र्स सल्लाहकार समितिको सदस्यमा समेत हालसालै मनोनयन हुनुभएको छ ।
बालबालिका र किशोर किशोरीको क्षेत्रमा क्रियाशील जागृति बाल तथा युवा सरोकार नेपालका अध्यक्ष तिलोत्तम पौडेलका अनुसार ताईवानको द गार्डेन अफ होप फाउन्डेसनले प्रत्येक वर्ष एसियन गल्र्स अभियान अन्तर्गत विभिन्न कार्यक्रमहरु र अभियानहरु गरिरहने र नेपालबाट सुरुवाती चरणबाट नै किशोरीहरूको सहभागिताको लागि पहल गराई रहेको बताउनु भयो ।
छनौट हुनुभएको किशोरी सवनम सुनारले १० जनाभित्रबाट अवार्ड जित्ने गरी तयारी गर्ने र नेपालको अभ्यासहरू एसिया महादेश भरी नै पुर्याउने गरी तयारी गरेर देशबाट प्रतिनिधित्व गर्ने उहाँले बताउनुभयो । नेपालबाट हालसम्म श्रद्धा महत, बिपना शर्मा, आस्मा अर्याल, आशा विकले ताइवान मा नै गएर भौतिक रूपमा र कोरोनाको समयमा धेरै किशोरीहरूले अनलाइनबाट सहभागिता जनाई किशोरी अधिकारको लागि नेपालमा भएका अभ्यासहरूको बारेमा जानकारी र अव को समयमा सरोकारवालाहरूले गर्नुपर्ने विषयहरूको बारेमा ध्यानाकर्षण गराउने गरेको तिलोत्तम पौडेलले बताउनुभयो ।
संस्थाले स्थापनाकालीन समयबाट नै बाल अधिकार, किशोरी अधिकार र बालमैत्री स्थानीय शासन, पोषणमैत्री, युवामैत्री स्थानीय शासनको वकालत सहित दक्षिण एसियामा नै नमुना बालिका सिकाई तथा स्रोत केन्द्र देवचुलीको वडा नंं. १० मा निर्माण गरिरहेको छ ।
